Иргэний тоон гарын үсэг хэрхэн авах вэ — заавар

Тоон гарын үсэг нь Цахим гарын үсгийн тухай хуулиар бичмэл гарын үсэгтэй адил хүчинтэй (6.3 дугаар зүйл). Үүгээр e-mongolia.mn зэрэг төрийн цахим үйлчилгээнд нэвтэрч, гэрээ, албан бичигт хуулийн хүчинтэй гарын үсэг зурна.

Тоон гарын үсгийг хоёр замаар авч болно: төрөөс үнэгүй эсвэл тусгай зөвшөөрөлтэй хувийн олгогчоос.

1. Төрөөс үнэгүй — G-Sign

Улсын бүртгэлийн ерөнхий газар Монгол Улсын иргэнд тоон гарын үсгийг үнэ төлбөргүй, 5 жилийн хугацаатай олгодог. Гэрчилгээ нь иргэний үнэмлэхийн санах ой (чип) эсвэл гар утасны аппликейшнд байршина.

Хаанаас авах вэ?

G-Sign-ийг иргэний үнэмлэхтэйгээ дараах газруудаас авч болно:

• УБЕГ-ын салбарууд — улсын бүртгэлийн байгууллагад биечлэн хандаж;
• УБЕГ-ын киоск машин;
• Хаан банк болон бусад банкны АТМ;
• Бусад төрийн үйлчилгээний киоск.

Гар утсандаа G-Sign идэвхжүүлэх

Утсаараа гарын үсэг зурахын тулд G-Sign-ийг гар утасныхаа апп-д идэвхжүүлнэ:

1. Утсандаа Улсын бүртгэлийн ерөнхий газрын G-Sign апп-ыг татаж суулгана.
2. АТМ эсвэл киоскоос G-Sign авахад идэвхжүүлэх QR код хэвлэж өгнө.
3. G-Sign аппаа нээж, хэвлэсэн QR кодыг уншуулна.
4. Апп-ын зааврын дагуу идэвхжүүлэлтээ дуусгана. Үүний дараа утсаараа гарын үсэг зурах боломжтой болно.

QR код нь таны тоон гарын үсгийг идэвхжүүлэхэд зориулагдсан тул бусдад бүү дамжуулаарай.

Дэлгэрэнгүй, хамгийн сүүлийн журмыг burtgel.gov.mn/g-sign хуудаснаас харна уу.

2. Тусгай зөвшөөрөлтэй олгогчоос (байгууллага, иргэн)

Байгууллагын тоон гарын үсэг (цахим тамга) болон иргэний төлбөртэй тоон гарын үсгийг Tridum Key, Monpass, New Compass зэрэг тусгай зөвшөөрөлтэй олгогчтой холбогдож цахимаар болон биечлэн авна.

Цахим хөгжил, инновац, харилцаа холбооны яамны нийтэлсэн жагсаалтад дараах олгогчид багтсан байна (mddic.gov.mn/eng/signature):

Хуулийн 16.2-т зааснаар олгогч таны иргэний үнэмлэх эсвэл гадаад паспортоор хэн болохыг тань шалгасны дараа гэрчилгээ олгоно. Үнэ, хугацаа олгогч бүрт өөр тул тухайн олгогчийн сайтаас шалгана уу.

Жишээ: Tridum Key

• Иргэн: иргэний үнэмлэх, өргөдлийн маягт.
• Байгууллага: иргэний үнэмлэх эсвэл e-Mongolia лавлагаа, улсын бүртгэлийн гэрчилгээ, эх хувь албан бичиг, төлөөлөгч ирвэл итгэмжлэл.
• Урьдчилан онлайнаар бүртгүүлээд, токеноо биечлэн очиж авна.

Эх сурвалж: tridumkey.mn

Жишээ: Monpass

Гэрчилгээ нь е-токенд суулгагдаж, 1 эсвэл 2 жилийн хугацаатай байна. Токены нууц үгээ мартвал иргэний үнэмлэхтэйгээ оффист нь очно. Эх сурвалж: monpass.mn/faq

Аль нь танд тохирох вэ?

• Хувь хүн, өдөр тутмын хэрэглээ — G-Sign үнэгүй бөгөөд киоск, АТМ-аас ч авах боломжтой.
• Байгууллага, цахим тамга — тусгай зөвшөөрөлтэй олгогчоос токен эсвэл үүлэн гэрчилгээ авна.
• Гэрчилгээний хугацаа дуусахаас өмнө сунгуулахаа мартуузай — хугацаа нь дууссан гэрчилгээгээр шинээр гарын үсэг зурах боломжгүй.

Тоон гарын үсгээ гэрээнд ашиглах

Тоон гарын үсэгтэй болсны дараа isign дээр гэрээ үүсгэж, талуудаа урьж, гарын үсэг зуруулж болно. isign нь Gsign, Tridum, Monpass, Newcompass-ийн токеныг дэмждэг. Хувь хүн G-Sign гар утасны аппаараа, байгууллага токеноороо зурна (хэрхэн зурах).

Мөн өөрт ирсэн баримтын гарын үсэг хүчинтэй эсэхийг гарын үсэг шалгах хуудсаар шалгаж болно.

Энэхүү заавар нь мэдээллийн зориулалттай. Шаардлага, үнэ өөрчлөгдөж болох тул олгогчийн албан ёсны сайтаас нягтална уу.